Флагмандық турнирдегі кезекті ойын демалысының қорытындысын шығарамыз.
Екі астананың дербиінде сенсация болған жоқ
Қазіргі чемпиондар маусымды бірде-бір рет сүрінбей жалғастыруда – Тимур Сегізбаев атындағы стадионда «сары-қаралар» «Астананы» 6:0 есебімен ойсырата жеңді.
Матч тағдыры үзіліске дейін-ақ шешілді: Алихан Абди 4-минутта есеп ашты, Султанали Абдуали мен Тарлан Ербулатов 17 және 22-минуттарда гол соқты, ал бірінші таймның қосылған уақытында Алихан Жумабек мергендік танытты. Үзілістен кейін Абдуллах Бигали мен Даулет Орынбасар тағы екі гол қосты.
Мүмкін болған 39 ұпайдың 39-ы, 59 соғылған және небәрі 5 жіберілген гол – «Қайрат» бір матчта орта есеппен 4,5 гол соғады. Ал «Астана» үшін бұл қатарынан үшінші жеңіліс болды – елордалық команда сегізінші орында келеді.
«Шахтер» арақашықтықты сақтап қалды
Қарағандыда «кеншілер» «Ертістің» қақпасына жауапсыз үш гол соқты.
10-минутта есепті Расул Акимов ашты, ал екінші таймда Артем Алексеев пен Данил Золкин мергендік танытты. 47-минутта «Ертіс» пенальти орындауға мүмкіндік алғанымен, Ярослав Колесниктің соққысы бағанаға тиді.
Қарағандылықтар 30 ұпаймен екінші орнын және лигадағы сенімділігі жағынан екінші қорғаныс көрсеткішін сақтап қалды – небәрі 8 гол жіберген. «Қайраттан» тоғыз ұпай артта келеді, ал маусымның аяқталуына дәл сонша тур қалды. 8 ұпайы бар «Ертіс» турнир кестесінің соңғы орнында тұр.
«Ордабасының» жеңісті сериясы жалғасуда
Шымкенттіктер өз алаңында «Тобылды» қабылдап, тартысты ойында үш ұпайды жұлып алды – 2:1.
Құдірет Ботабек 9-минутта есеп ашты, алайда Назар Захарченко 20-минутта пенальтиден таразы басын теңестірді. Алаң иелеріне жеңіс әкелген голды 57-минутта Әділбек Тұрдах соқты.
«Ордабасы» қатарынан бесінші жеңісіне жетіп, 26 ұпаймен үшінші орынды нық ұстап тұр. Қостанайлықтар бесінші орында қалды – «Тобылдың» соғылған және жіберілген голдар айырмасы қайтадан нөлге теңесті (13:13).
ҚФФ академиясы Қызылордада жеңіске жетті
Флагмандық турнирдің ең жас командасы қатарынан екінші жеңісіне қол жеткізді. Алайда бұл оңай болған жоқ.
«Қайсар» ҚФФ академиясының қақпасына 2-минутта-ақ гол соқты – қорғаушы Жалғас Сайлаубек мергендік танытты. Дегенмен «қасқырлар» басымдығын сақтап қала алмады – үзіліске дейін Асхат Дутпаев есепті теңестірсе, екінші таймда Давид Заречный мен Арғын Жұмагелді гол соқты. Қорытынды есеп – 3:1, қонақтардың пайдасына.
Матч өте қатқыл өтті – төреші негізінен дөрекі ойын үшін жеті сары қағаз көрсетті.
ҚФФ академиясының еншісінде 17 ұпай бар. Команда доп айырмасы бойынша «Жас Қыраннан» қалып, жетінші орында тұр. Ал «Қайсар» бес матч қатарынан жеңіске жете алмай, тоғызыншы орында келеді.
«Ақтөбе» Ақтауда жеңісті жұлып алды
Турдың ең драмалық аяқталуы BS Arena стадионында тіркелді. Мұнда «Ақтөбе» «Каспийді» 3:2 есебімен жеңді.
Аян Аманжуловтың пастарынан кейін «қызыл-ақтардың» жартылай қорғаушысы Бикжан Жанаев дубль жасап, матчтың тағдырын шешкендей көрінді. Алайда алаң иелері беріле қойған жоқ. 74-минутта Рамазан Амангельдыев есеп айырмасын қысқартса, 81-минутта Нұрдәулет Сарсенгали есепті теңестірді.
Дегенмен ақтаулықтардың қуанышы ұзаққа созылмады – 85-минутта Ибрахим Бауыржанов қонақтарға жеңіс сыйлаған голды соқты.
19 ұпай жинаған «қызыл-ақтар» төртінші орынға көтерілді. «Каспий» маусымдағы оныншы жеңілісіне ұшырап, турнирде бірде-бір рет тең түспеген жалғыз команда болып қалды.
«Тараздың» көптен күткен жеңісі
Турдағы бір ғана гол жеткілікті болған жалғыз матч «Жастар» стадионында өтті.
«Тараз» үзілістен кейін алаңға шыққан Расул Нурманбайдың дәл соққысының арқасында «Жас Қыранды» жеңді.
Бұл оңтүстік командасының 5-турдан бергі алғашқы жеңісі болды – жеңіссіз серия жеті матчқа созылған еді.
Ал маусымды қатарынан төрт жеңіспен бастаған «Жас Қыран» енді үш тур бойы ұтылып келеді. Алматылықтар алтыншы орынға түсіп, жүлделі орындар үшін күрестен шығып қалу қаупіне тап болды.
13-турдан кейінгі үздік сұрмерген: Даулет Орынбасар («Қайрат», 14 гол).
13-турдан кейінгі үздік ассистент: Аян Аманжулов («Ақтөбе», 7 нәтижелі пас).
