Freedom QJ League U-17, U-16, U-15: 17-тур қалай өтті

Freedom QJ League U-17

Қарағандылықтар турнир кестесін бастады

«Шахтер» КФФ Академиясын 4:0 есебімен ойсырата жеңді. Артем Лящук дубль жасаса, Тимур Казанцев пен Никита Духов бір-бір голдан соқты.

Енді «кеншілер» турнир кестесінде жеке-дара көш бастап, «Қайраттан» үш ұпай алда келеді. Алайда бір нюанс бар: алматылықтар бұл турдағы матчын әлі өткізген жоқ. «Сары-қаралардың» турнир аутсайдері «Қайсарға» қарсы кейінге шегерілген кездесуі 19 қыркүйекте өтеді.

Қалай болғанда да, алтын жүлдеге үміткерлерді 21-турда екінші өзара кездесу күтіп тұр. Чемпиондық тағдырын дәл осы матч шешуі әбден мүмкін.

Қанат «Ордабасының» орнын нығайтты

Үшінші орында келе жатқан шымкенттік клуб Ақтауда «Каспийді» 2:0 есебімен жеңді. Екі голды да екінші таймда Бекасыл Қанат соқты.

Айта кетейік, үзілістен кейін алаң иелері бірден азшылықта қалды – Ақылбек Қаржаубай тікелей қызыл қағаз алды.

Оңтүстік командасы төртінші орында тұрған «Ақтөбеден» әлі де төрт ұпай алда. Алда небәрі бес тур қалғанын ескерсек, бұл жақсы басымдық. Алайда шымкенттіктердің келесі қарсыласы – «Қайрат».

Павлодардағы екі автогол

«Ордабасы» мен «Ақтөбе» арасындағы айырма «қызыл-ақтардың» «Ертісті» сырт алаңда жеңуінің арқасында өскен жоқ. Қонақтар 3:0 есебімен басым түсті, бірақ соғылған үш голдың тек біреуі ғана Ринат Жиембеков командасының ойыншысына жазылды.

6-минутта есепті Нұрдәулет Базарбаев ашты. Көп ұзамай «Ертіс» қорғаушысы Алмаз Қайрашев допты өз қақпасына бағыттап алды. Матчтың соңғы минуттарында Ансар Болат та автогол авторы атанды.

Freedom QJ League U-16

«Атлетиконың» жүзеге аспаған камбэгі

Пеле атындағы стадионда «Атлетико» «Шахтерге» 2:5 есебімен жол берді.

«Кеншілер» 14-минуттың өзінде екі доп айырмасымен алда тұрды. Алайда көп ұзамай интрига қайта жанданғандай болды – Мирон Ищенко он минут ішінде дубль жасап, алаң иелеріне есепті теңестіруге көмектесті.

Бірақ тепе-теңдік ұзаққа созылмады: «Шахтер» көп ұзамай қайта алға шығып, үзілістен кейін тағы екі гол соқты.

Қатарынан үшінші матчта ұпай жоғалтқан «Атлетико» «Ақтөбеден» кейін бесінші орында келеді және жүлде үшін күрестегі жағдайын айтарлықтай қиындатып алды. Бір ойыны кем, үшінші орында тұрған «Ордабасыға» дейінгі айырма – төрт ұпай.

Турнирде, еске салайық, «Қайрат» көш бастап тұр – 16 матчтан кейін 44 ұпай. Одан кейін «Шахтер» келеді – 17 ойыннан кейін 39 ұпай.

Freedom QJ League U-15

«Ертіс» пен «Жас Қыранның» жолы тағы болмады

Жүлдеге таласып жүрген бірден екі команда қатарынан екінші турда ұпай жоғалтты.

Бұған дейін үшінші орында тұрған павлодарлықтарды «Ақтөбе» басып озды. ОСДЮСШОР стадионындағы командалардың өзара кездесуі алаң иелерінің жеңісімен аяқталды.

«Ертіс» бірінші болып есеп ашты – 14-минутта Амаль Исаков гол соқты. Бірақ үзілістен кейін «қызыл-ақтар» матч барысын өзгерте алды: 71-минутта Алдияр Үмбаев ойыннан есепті теңестірсе, 78-минутта Алишер Тұратаев қақпашы қайтарған пенальтиден кейін допты қақпаға дәл бағыттады. 2:1.

Ал «Жас Қыран» алға шығу мүмкіндігін пайдалана алмады. Алматыда команда «Астанаға» 1:4 есебімен ірі жеңілді. Елордалықтар сапында Әлімжан Әушахманов, Самғат Толыбай, Ислам Тұрақбаев және Санжар Жұматай бір-бір голдан соқты. Алаң иелері тек Нұркен Ибадолланың голымен жауап берді.

«Каспийдің» көптен күткен жеңісі

Турнирдің басты аутсайдері маусымдағы екінші жеңісіне қол жеткізді – «Каспий» Шымкентте «Ордабасыны» минималды есеппен ұтты. Жалғыз голды 78-минутта Еларыс Қарықбол соқты.

Айта кетейік, алаң иелері матчтың басым бөлігін азшылықта өткізді – 27-минутта Азизбек Баходиров қызыл қағаз алды.

Ақтаулықтар турнир кестесінің соңғы орнында қала береді, бірақ енді олардың еншісінде жеті ұпай бар. «Ордабасы» 17-турдан кейін жетінші орында және үшінші орыннан алты ұпайға қалып келеді.

«Тобыл Аренадағы» эмоция

Қостанайда екінші орында келе жатқан «Тобыл» «Таразды» 2:0 есебімен жеңді. Есепті Исмеджан Бермухамбет ашты, ал Ильдар Жармағамбетов «гол+пас» жүйесі бойынша 1+1 нәтижесін тіркеді.

Алайда бұл матч төреші көрсеткен карточкалардың көптігімен де есте қалды – барлығы 10 карточка, оның үшеуі қызыл.

Келесі турда ең үлкен кадрлық шығынға «Тараз» ұшырайды – Давид Лим, Бибарыс Тілеуқабыл және Нариман Нұртазе дисквалификацияға байланысты матчты өткізіп алады. «Тобыл» сапында Мансур Исқақов бір ойынға шеттетілді.

17-турдан кейінгі үздік сұрмергендер
Freedom QJ League U-17: Тимур Тугамбеков («Жас Қыран», 12 гол);
Freedom QJ League U-16: Мирон Ищенко («Атлетико») және Балахмет Адилбек («Тобыл», 15 голдан);
Freedom QJ League U-15: Абылай Тұрсын («Қайрат», 23 гол).

17-турдан кейінгі үздік ассистенттер
Freedom QJ League U-17: Темірлан Абжапар («Қайрат», 9 нәтижелі пас);
Freedom QJ League U-16: Алихан Карим («Шахтер», 10 нәтижелі пас);
Freedom QJ League U-15: Абдурахим Оңғарбек («Қайрат», 16 нәтижелі пас).