Freedom QJ League жарысының 13-туры аяқталды. Лига А-ның кіші жас санаттарындағы матчтардың басты оқиғаларына тоқталамыз.
Freedom QJ League U-17
Көшбасшылар бір-біріне дес бермей келеді
«Кайрат» пен «Шахтер» кезекті кездесулерінде жеңіске жетіп, жеке-дара көшбасшылық үшін күресті жалғастыруда. Екі команданың да еншісінде 11 жеңіс пен екі тең ойын бар. Қосымша көрсеткіштер бойынша алматылықтар алда: сары-қаралардың доп айырмасы +50 болса, қарағандылықтарда бұл көрсеткіш +26-ға тең.
Өткен турда сары-қаралар өз алаңында «Астананы» 8:1 есебімен ойсырата жеңді. Матчтың тағдыры үзіліске дейін-ақ шешілді: Радмир Вдовин 2-минутта есеп ашса, Темирлан Абжапар 8-минутта басымдықты еселеді. Тайм соңында Георгий Гречка мен дубль жасаған Абжапар есеп айырмасын одан әрі ұлғайтты.
Үзілісте Русланжан Раимбакиев бірден бес ойыншыны алмастырды және бұл шешім өз нәтижесін берді. Екінші таймдағы төрт голдың үшеуін қосалқы құрамнан алаңға шыққан футболшылар соқты: Абдрахман Сарбасов (72’), Ибрахим Асан (84’) және Алижан Зару (90’). Сондай-ақ 86-минутта Абжапар хет-тригін рәсімдеді. «Астананың» жалғыз голын 59-минутта Амир Асатов пенальтиден соқты.
«Шахтер» өз міндетін басқаша орындады. Үзіліске дейін кеншілер Али Садырбаевтың дәл соққысынан кейін «Иртышты» минималды есеппен ұтып жатты (35’), ал екінші таймда нәтижелілігін күрт арттырды: Тимур Казанцев 46-минутта, Альтаир Рапилбек 51-минутта көзге түсті. Матчтың нүктесін Айдар Куанышбек қойды (77’) — қорытынды есеп 4:0.
Қарағандылықтар үшін жалғыз жағымсыз жайт — бір гол мен екі нәтижелі паспен ерекшеленген Садырбаевтың алаңнан қуылуы. Али 89-минутта екінші сары қағазын алып, келесі матчқа қатыса алмайды.
«Иртыш» 12 ұпай және 40 жіберілген голмен оныншы орында келеді.
«Актобе» сан басымдығын пайдаланып, «Каспийді» жеңді
Ақтаудағы матч «Актобенің» 2:1 есебімен қонақтағы жеңісімен аяқталды. Кездесудің тағдырын соңғы жиырма минут шешті.
Алинур Кенжин 18-минутта есеп ашты, алайда үзілістен кейін алаң иелері таразы басын теңестірді: Руслан Крамаровский 51-минутта пенальтиді сәтті орындады. Артынша «Каспий» азшылықта қалды — 70-минутта қақпашы Нурсултан Солтангазы тікелей қызыл қағаз алды.
Реджепмурат Агабаев қосалқы қақпашы Эхсан Дженагиді алаңға шығаруға мәжбүр болды. Ол үшін гол авторы Крамаровский ойынды аяқтады. Ақтаулықтар тең есепті сақтап қала алмады: 87-минутта орталық қорғаушы Абдуллах Отеген қызыл-ақтарға жеңіс сыйлады.
«Актобе» 23 ұпаймен төртінші орынға нық жайғасты. 13 ұпайы бар «Каспий» жетінші орында келеді.
«Жас Кыран» он ойыншымен жеңілістен құтылды
«Тараз» бен «Жас Кыран» тең түсті, дегенмен оңтүстік командасы үш ұпайға қол жеткізуге жақын болған еді.
«Тараздың» қорғаушысы Батырхан Серикбай 7-минутта есеп ашты. Бірінші тайм соңында қонақтар азшылықта қалды: Айбар Раимбек перспективалы шабуылды тоқтатқаны үшін бірнеше минуттың ішінде екі ескерту алды.
Екінші таймды түгелдей он ойыншымен өткізген алматылықтар соған қарамастан жеңілістен құтылды. Үзілісте алаңға шыққан Жанай Сериккул 71-минутта есепті теңестіріп, «Жас Кыранның» қаһарманы атанды. Қорытынды есеп — 1:1.
«Тараз» 12 ұпаймен тоғызыншы орында. 20 ұпай жинаған «Жас Кыран» бесінші сатыда қалып, «Актобеден» үш ұпайға артта келеді.
Freedom QJ League U-16
«Атлетико» «Кайсарды» ойсырата жеңді
Талғардағы кездесу турдың ең ірі есебімен аяқталды — 8:0.
Ахмет Туран Джошкун 22-минутта есеп ашты, ал кейін Расул Самаев хет-трик жасап, есепті ойсырата жеңіске жеткізді.
Үзілістен кейін Ануар Жагиппар бірден үш ойыншыны алмастырды. Ойыннан Самаев та алынып, оның орнына Мирон Ищенко шықты. 58-минутта ол пенальтиді орындай алмады — «Кайсар» қақпашысы Аймурат Хамза соққыны қайтарды.
Алайда бұл Миронды тоқтатқан жоқ. Арман Батырхан 68-минутта есепті 5:0-ге жеткізгеннен кейін Ищенко 12 минуттың ішінде өзінің хет-тригін рәсімдеді.
Осылайша, «Атлетико» қатарынан үшінші жеңісіне жетіп, 22 ұпаймен төртінші орынға көтерілді. Команда «Ордабасыдан» небәрі екі ұпайға қалып келеді. Алты ұпайы бар «Кайсар» бесінші рет қатарынан жеңіліп, соңғы орында қалды.
Адилет Орынбасар «Актобеге» жеңіс сыйлады
Ақтөбедегі кездесудің басым бөлігінде нәтижелі аяқталатынын ештеңе аңғартқан жоқ. Командалар ұзақ уақыт бойы гол соға алмады, есесіне жалпы саны алты ескерту алды. Оның төртеуі «Каспий» футболшыларына көрсетілді.
Ерик Ермагамбетов 54-минутта шабуылшы Адилет Орынбасарды алаңға шығарды. Ол алты минуттың ішінде матчтың тағдырын шешті: 74 және 78-минуттардағы голдары «Актобеге» 2:0 есебімен жеңіс әкелді.
«Актобе» 21 ұпаймен бесінші орында және «Атлетикодан» бір ұпайға ғана қалып келеді. 10 ұпай жинаған «Каспий» оныншы орында тұр және 43 гол жіберіп, турнирдегі қорғанысы ең осал команда болып қалуда.
Freedom QJ League U-15
«Кайрат» қарсыластарынан ұзай түсті
Он үшінші тур екінші орында тұрған «Тобыл» үшін өте сәтсіз өтті.
«Кайрат» «Астананы» 3:0 есебімен жеңді. Үш голдың барлығын бір футболшы соқты: Диас Абубакир 14, 53 және 64-минуттарда көзге түсті. Алматылықтардың жалпы доп айырмасы аса әсерлі — 85:8.
«Тобыл» өз алаңында «Ордабасыны» қабылдап, үш жауапсыз гол жіберіп, маусымдағы екінші жеңілісіне ұшырады. Азизбек Баходиров 12-минутта есеп ашса, үзіліске дейін Асанали Абдуохаб қонақтардың басымдығын еселеді. Үшінші гол ерекше жағдайда соғылды: Ермухамед Жомартулы 67-минутта алаңға шығып, бір минуттан кейін көзге түсті.
Қостанайлықтардың сүрінуін «Иртыш» өз пайдасына қолданды. Павлодарлықтар өз алаңында «Шахтерді» қабылдап, есепте артта қалғанына қарамастан жеңіске жетті. Ерасыл Абилда 27-минутта қарағандылықтарды алға шығарды, бірақ екінші таймда қорғаушы Айдос Отепов есепті теңестірді. Артынша Алихан Айтмухамбет пенальтиді сәтті орындады — 2:1.
Енді «Кайраттың» еншісінде 37, «Тобылда» 27, ал «Иртышта» 25 ұпай бар. Көшбасшының басымдығы он ұпайға дейін өсті, ал павлодарлықтардың екінші орыннан артта қалуы екі ұпайға дейін қысқарды. 20 ұпай жинаған «Шахтер» жетінші орынға түсті.
«Атлетико» алғашқы жеңісіне қол жеткізді
Талғарда эмоцияға толы оқиға болды. «Атлетико» осыған дейін турнирде жеңіске жетпеген жалғыз команда еді: 12 турда бес тең ойын және жеті жеңіліс. Он үшінші турда бұл серия ақыры тоқтады. Оның үстіне «Атлетико» «Кайсарды» 4:0 есебімен сенімді жеңді.
Барлығы бірінші таймда шешілді. Аян Куан 6-минутта есеп ашты, ал 30 және 31-минуттарда алаң иелері екі гол соқты: алдымен Амиржан Омирзак көзге түссе, кейін Куан дубль жасады. Үзілістен кейін матчтың нүктесін Мухаммад Муртазалиев қойды. Ол 52-минутта алаңға шығып, 70-минутта гол соқты.
Енді «Атлетико» сегіз ұпаймен оныншы орында. Турнир кестесін түйіндеп тұрған «Кайсар» үшін бұл жеңіліс қорғаныстағы мәселелердің кезекті дәлелі болды: команда 66 гол жіберді — бұл турнирдегі ең нашар көрсеткіш.
13-турдан кейінгі үздік сұрмергендер
Freedom QJ League U-17: Темирлан Абжапар («Кайрат») және Тимур Тугамбеков («Жас Кыран») — 10 голдан;
Freedom QJ League U-16: Балахмет Адилбек («Тобыл») — 13 гол;
Freedom QJ League U-15: Абылай Турсын («Кайрат») — 21 гол.
13-турдан кейінгі үздік ассистенттер
Freedom QJ League U-17: Темирлан Абжапар («Кайрат») — 9 нәтижелі пас;
Freedom QJ League U-16: Дамир Алибаев («Тобыл») және Алихан Карим («Шахтер») — 8 нәтижелі пастан;
Freedom QJ League U-15: Абылай Турсын және Абдурахим Онгарбек (екеуі де — «Кайрат») — 9 нәтижелі пастан.
