Лиганың ресми фэнтези-турнирінің 13-турының жеңімпазы 86 ұпай жинады. Бұл жасанды интеллект моделі құрастырған құрамнан 27 ұпайға көп.
Еске салайық, Fantasy QJ League аясында әр ойын уик-эндінің қорытындысы бойынша үздік құрам иелері COPA.KZ ұсынған 20 000 теңгелік сертификатқа ие болады. Өткен уик-эндтің ең нәтижелі ростерін modeerf қолданушысы жинады. Бұл – оның маусымдағы алғашқы жеңісі.
Жоғары нәтижеге маусымда ең көп фэнтези-ұпай жинаған жартылай қорғаушы Расул Акимов пен оның «Шахтердегі» әріптесі, қорғаушы Данил Золкин айрықша үлес қосты. Екі футболшы да «Ертіске» қарсы өткен үй матчында бір-бір голдан соғып, қарағандылық команданың жеңіске жетуіне көмектесті. Тур жеңімпазы Акимовты өз құрамының капитаны етіп таңдағандықтан, ол жинаған 9 ұпай екі еселенді.
Ал Золкин қорғаушы ретінде қақпасына гол жібермегені және допты қайтарып алу көрсеткішінің жоғары болғаны үшін қосымша ұпайлар алды. Оның жалпы үлесі 14 ұпайды құрады. Айта кетейік, Данилдың бұл голы Лиганың флагмандық турниріндегі дебюттік добы болды.
Тағы 12 ұпайды «Қайраттың» қорғаушысы Алихан Абди жинады. Өткен турда ол «Астана» қақпасына гол соқты, ал екі астананың дербиі «сары-қаралардың» 6:0 есебіндегі жеңісімен аяқталды.
Жасанды интеллект 13-турға арнап құрастырған құрам уик-энд қорытындысы бойынша 59 ұпай жинады. Жүйе Расул Акимовты капитан ретінде дұрыс таңдағанымен, Золкин мен Абди ұсынылған ростерге енген жоқ.
Фэнтези-турнирге алғашқы турдан бері қатысып келе жатқан modeerf маусымның жалпы есебінде алтыншы орында тұр – 895 ұпай. Көш басында olegforwards (939) орналасқан, екінші орында Plescavica_Team (936), ал үздік үштікті alishkaa (913) түйіндеп тұр.
Маусым жеңімпазы iPhone 17 смартфонына ие болады. Екінші және үшінші орын алған қатысушыларға тиісінше PlayStation 5 пен Apple Watch табысталады.
Бұған дейін жарысқа қатыспаған жанкүйерлер де дәл қазір қосылып, апта сайын COPA.KZ сертификаты үшін бақ сынай алады. Сонымен қатар фэнтези-турнирдің Telegram-да 300-ден астам қатысушысы бар жеке чаты жұмыс істейді. Ондағы тәжірибелі ойыншылар жаңадан қосылған қатысушыларға көмектесуге дайын.
Fantasy QJ League: құрамды жинап үлгеріңіз!
