Freedom QJ League B 11-турының матчтары қалай өткенін баяндаймыз.
«Алтайдың» көптен күткен жеңісі
Турдың басты оқиғасы Өскеменде болды. Алғашқы он турда небәрі бір ұпай жинап, бірде-бір рет жеңіске жетпеген «Алтай» екінші орында келе жатқан «Жайықты» 2:1 есебімен ұтты.
Кездесудің бірінші жартысында гол соғылған жоқ. Алайда үзілістен кейін көп ұзамай алаң иелері пенальти орындау құқығына ие болды – 11 метрлік айып добын Дәулет Дәутбаев дәл орындады. 61-минутта Бейбарыс Серікқали есепті теңестіріп, ойын тең нәтижемен аяқталатындай көрінген. Бірақ қосылған уақытта «Алтай» капитаны Захар Иванов Павел Евтеевтің командасына көптен күткен үш ұпайды сыйлады.
«Алтай» төрт ұпаймен әлі де турнир кестесінің соңғы орнында тұр. Дегенмен шығысқазақстандықтар енді алға жылжуға негіз болатын маңызды нәтижеге қол жеткізді – тоғызыншы орынға дейінгі аралық жеті ұпайды құрайды, ал алда әлі жеті тур бар.
«Жайық» үшін бұл жеңіліс сәтсіз серияның жалғасы болды – оралдықтар қатарынан төрт тур бойы жеңіске жете алмай келеді: үш тең ойын және Өскемендегі жеңіліс. Руслан Жәңгірдің командасы 21 ұпаймен екінші орнын сақтап қалды, бірақ «Жеңістен» алты ұпайға қалып қойды.
«Жеңіс» Көкшетауда камбэк жасады
Чемпионат көшбасшысы сырт алаңда қиын матч өткізгенімен, Көкшетаудан үш ұпаймен қайтты – 3:2.
Есепті алаң иелері ашты: 17-минутта Арсен Арапов мергендік танытты. Қонақтардың жауабы жылдам әрі нәтижелі болды – Әмірхан Абай 23-минутта есепті теңестірді, Ұлықбек Нәлібек бірінші таймның соңына қарай «Жеңісті» алға шығарды, ал 53-минутта қорғаушы Илья Горячих басымдықты екі допқа жеткізді.
«Оқжетпес» Нұралы Сабыржанның голының арқасында есеп айырмасын қысқартты, бірақ алаң иелері қонақтардың басымдығын жоя алмады. Матчтың соңы тартысты өтті: 80-минуттан бастап төреші жалпы саны бес сары қағаз көрсетті.
Марат Зайнудиновтің шәкірттері 11 матчтағы тоғызыншы жеңісіне қол жеткізіп, 27 ұпаймен турнир кестесін сенімді түрде бастап келеді. «Оқжетпес» 17 ұпаймен төртінші орында қалды, алайда екінші орыннан небәрі төрт ұпайға қалып тұр.
Семейдегі «Хан-Тәңірінің» алты голы
«Хан-Тәңірі» қатарынан үш тең ойыннан тұратын сериясын өте сенімді түрде тоқтатты – Алматы командасы «Елімайды» сырт алаңда 6:1 есебімен ойсырата жеңді.
6-минутта Дінмұхамед Біржанұлы есеп ашты, кейін Ілияс Шүкебаев мергендік танытты. Алаң иелері бірінші таймға қосылған уақытта жауап беріп үлгерді – Вадим Сайбель пенальтиді дәл орындады. Алайда үзілістен кейін алматылықтар жауапсыз тағы төрт гол соқты: Жанәді Жұмабек, Ардақ Сәрсен, Әділжан Қайрат және Даниял Мұрат мергендік танытты. Сәрсен мен Мұрат алаңға екінші таймда қосалқы құрамнан шықты.
Бұл – Дмитрий Юрковтің командасы бір матчта алты гол соққан биылғы маусымдағы екінші жағдай. Бұған дейін «Хан-Тәңірі» өз алаңында «Қызылжарды» ірі есеппен жеңген болатын. Алматы командасы мен «Жеңіс» нәтижелілік бойынша бірінші орынды бөлісіп тұр – әрқайсысында 30 голдан.
«Хан-Тәңірі» 21 ұпаймен үшінші орында келеді және «Жайыққа» тек өзара кездесулердің нәтижесі бойынша жол беріп тұр. «Елімай» үшін бұл қатарынан үшінші жеңіліс болды.
Балпық бидегі тартысты ойын
«Жетісу» мен «Атырау» арасындағы кездесу алаң иелерінің 2:0 есебімен жеңісімен аяқталды. 22-минутта есепті Әлихан Диния ашты, ал үзілістен кейін алаңға шығып, 81-минутта гол соққан Тамирлан Смағұл қорытынды нәтижені белгіледі.
Ойын өте тартысты өтті: төреші жеті сары және бір қызыл қағаз көрсетті. 82-минутта «Жетісудың» жартылай қорғаушысы Мұхаммедәмин Байділдин алаңнан қуылды.
Осы үш ұпайдың арқасында жетісулықтар «Оңтүстікпен» ұпай санын теңестіріп, 16 балл жинады және «Оқжетпеске» барынша жақындады. «Атырау» 12 ұпаймен сегізінші орында қалды.
«Қызылжардың» минималды жеңісі
Петропавлдықтар «Оңтүстікті» 1:0 есебімен жеңіп, маңызды үш ұпайға қол жеткізді. Матчтағы жалғыз гол 6-минутта соғылды – Абылайхан Кенжадоев мергендік танытты.
87-минутта алаң иелерінің жартылай қорғаушысы Роман Комаровский қызыл қағаз алды. Соған қарамастан, Андрей Селиверстовтің командасы есепті сақтап, ойынды гол жіберместен аяқтады.
Бір қызығы, «Қызылжар» лигадағы ең нәтижесіз шабуылға ие – 11 турда тоғыз гол. Соған қарамастан, команда үш рет жеңіске жетіп үлгерді. Қазір солтүстікқазақстандықтар 11 ұпаймен тоғызыншы орында тұр.
«Оңтүстік» жоғары көтерілу мүмкіндігін пайдалана алмады – Freedom QJ League B-ның екі дүркін чемпионы бесінші орында қалды.
11-турдан кейінгі үздік сұрмерген: Жанәді Жұмабек («Хан-Тәңірі», 9 гол).
11-турдан кейінгі үздік ассистент: Нұралы Сабыржан («Оқжетпес», 5 нәтижелі пас).
